مشاهير الفن يتفاعلون مع واقعة “طالبة المنصورة” في مصر
تفاعل عدد من نجوم الفن بمصر، مع حادث مقتل الطالبة نيرة من جامعة المنصورة، أمس، على يد أحد الشباب أمام باب الجامعة.
وعلق أحمد جمال على الخبر عبر حسابه الشخصي على موقع التواصل الاجتماعي “فايسبوك”: “اللي خد القرار انه يقتل البنت دي طالب جامعة يعني لا يتخطى ال ٢٢ سنه بمنتهى الجرأه و السهولة خد قرار انه ينهي حياة شخص فكر و دبر و حدد الميعاد اللي هينفذ فيه جريمته الحقيقه انا مصدوم و حزين …”.
وأضاف: “ربنا يرحمك يا بنتي وكلامي لأي شاب صغير الشهامة والرجولة يابني انك تخاف على اللي بتحبه وتحافظ عليه ولو مش عايزك في حياته خلاص شوف طريقك وابعد في هدوء من غير اذى اتعلموا الرحمة و علموها لولادكم من دلوقتي قبل بكره”.
وكتبت أيتن عامر: “هو اللى جرا فى الدنيا !!!! ربنا يرحمها يا رب انا مش لاقيه حاجة اقولها”.
أما ريهام حجاج فكتبت رسالة قالت فيها : “لا حول و لا قوة إلا بالله العلي العظيم اللهم أرحمك يا نيرة و يصبر أهلك و يجعلك من أهل الجنة يا حبيبتي شهيدة…شهيدة الأخلاق و الأنسانية إللي خلاص ماتوا و ادفنوا في قلوب الكثيرين… ”
وتابعت: “إيه إللي جري للناس !!! الناس باقيت وحوش لا خايفة من ربنا و لا من قانون …الكره و الحقد و الغل و الأذي باقوا سمات العصر حقيقي الواحد حزين علي أهل بلده و علي إللي وصلناله اللهم أرحمنا برحمتك و أحمي أهالينا و أولادنا وأخرجنا منها سالمين اللهم آمين”.
مايان السيد كتبت سلسلة تغريدات عن الموضوع عبر تويتر: “تفتكروا حقها هيرجع بس لما يتعدم؟ و لا هيرجع فعلا لما نربي بجد عشان فعلا يبقوا رجالة محترمين؟ يعرفوا ازاي يحترموا كل بنت و كل ست و ميشوفوش انو من حقهم يغتصبوا و يقتلوا! ربوا ان العنف تجاه المرأة بكل اشكاله غلط! و انك تبقي راجل يعني تبقي انسان و يبقي قلبك علي غيرك”.
سمية الخشاب كتبت في تغريدتها: “ارجوكم لو لقيتو اي ست بتتضرب او بتتعرض لعنف في اي مكان اتدخلوا يمكن تنقذوا حياتها، حرام بنت في العمر ده لسه ماشافتش دنيا تروح عشان حقير مجرم قاتل زي ده، ربوا اولادكم بقي عشان قرفنا، متخلفوش لو انتوا مبتعرفوش تربوا كفايه!! واعدام ان شاء الله”.
